د حقاني نېټ ورک په حواله د امريکې له اړخه پاکستان ته د حملې دړکې يوه نوې سياسي کشاله راپورته کړې ده په دې لړ کښې په تېرو ورځو د ال پارټيز کانفرنس يو ډېر مهم او حساس اجلاس وشو چې پکښې د سياسي ګوندونو نه علاوه د فوج او خفيه ايجنسو مشرانو هم برخه واخسته ،سياسي مشرانو د موجوده امن او امان په حواله خپل تجويزونه او مشورې ورکړې د سياسي ګوندونو د مشرانو تجويزونه او مشورې په خپل ځائې به د وطن د سلامتيا دپاره ټيک وي خو په تېره تېره د محمود خان اچکزۍ خبرې يو ډېر تاريخي حېثيت او ارزښت لري او هغه دا چې هغۀ د I S I مشر ته په ډاګه کړه کۀ تۀ نن هم وغواړے نو په ټول ملک او افغان وطن کښې په يو مياشت کښې امن راتلے شي د محمود خان دا خبره په ټول اجلاس کښې چا رد هم نۀ کړه بلکې د فوج مشرانو ډېر په سنجيدګۍ سره د محمود خان خبره واورېده او بيا په ميډيا کښې هم د محمود خان د دې خبرو ډېره ستائېنه وشوه د دې نه دا معلوميږي چې خفيه ايجنسۍ او بيا په خصوصي توګه I S I د ملک په امن و امان کښې يو مهم رول لوبولے شي ديورياست دخفيه ايجنسودا ذمه داري وي چې هغه ملک دکورني اوبهرني چپاوونوExternal Aggressions and Internal نه وساتي نو دا د وخت ضرورت دے چې سياسي ګوندونه په يوه جمهوري طرز او I S I په خپله يوه پېشه ورانه طرز په ملک کښې عموماً او په پښتونخوا کښې خصوصاً د امن د بحالولو دپاره هلې ځلې پېل کړي او د افغانستان د استحکام او استقلال ضمانت دې ورکړي او د بهرني هېوادونو په کورنو چارو کښې دې ګوتې وهل پرېږدي او د هر قسمه ترهه ګرو مخ نيوې دې وکړي او دغه رنګه دا هم د سياسي ګوندونو د اولسي حکومت غټه ذمه واري ده چې د ګاونډي هېوادونو سره دې خپلې اړيکې ټينګې کړي او کله چې دا وشي نو د دنيا يو طاقت هم د دې ملک د دفاع ازمېښت نۀ شي کولے بلکې دا به پرمختګ پله يو ګړندے ګام وي.

NTS/GAT
يو غېر ضرورى ازمېښت
National testing service/General Assesmant Test

د جنرل مشرف په دور کښې يوه تعليمي پاليسي جوړه شوه د کومې تر مخه چې د ايم فل او د  بهر سکالرشپ دپاره به يو طالب علم اول NTS/GAT پاس کوي نو بيا به هغه د داخلې اهل وي په NTS/GAT کښې د انګرېزۍ سره رياضي او Analaytical ټسټ شامل دے اوس کۀ د سائنس سره تعلق لرونکى ته دغه ټسټ شرط وى نو څۀ جواز جوړيدے شي او کۀ دا د ادب يا سوشل سائينسز طالب علم دپاره دغه شرط وي نو دا پاليسي بېخي غلطه او بې بنياده ده ځکه چې کۀ يو طالب علم په عربۍ، پښتو، اسلاميات، پوليټکل سائنس وغېره مضمون کښې ايم فل يا پي . ايچ. ډي کول غواړى نو هغه په کوم دليل د رياضۍ Maths يا انګرېزۍ ټسټ پاس کړي اوس کۀ د دې په ځائې Subject NTS وې نو جواز او ضرورت ئې وۀ په دې وجه ډېر طالبعلمان د مزيد تعليم او ريسرچ نه پاتې کيږي چې دا د ملک په ترقۍ کښې يو لوے خنډ دے د NTS/GAT امتحان اخستل د فوځ يو شاخ په حواله شوے دے او د دې امتحان چې څومره امدن دے هم هغوي ته په لاس ورسى. ضرورت دا دے چې حکومت بيخي دا پاليسي بدله کړي چې اصل طالبعلمان په صحيح توګه تحقيق ته چمتو شي او د يو غېر ضروري ازمېښت نه بچ شي ځکه چې د سياله او پر مخ تللى قامونو دپاره د تعليم او علم دروازې پرانستې پکار دي بندول ئې تيئرې راوستل دي

Pasoon November December 2011