نوي انتخابات، 

د خلقو او د پښتنو ليکونکو توقعات

            په اتلسمه فرورۍ کال 2008 په ملک کښې عام انتخابات وشو، خلقو د مرکزي او صوبائي اسمبلو دپاره نوي ممبران يعني مشران وټاکل او اختيار ئې ورکړو. د نوو منتخب شوو مشرانو نه د خلقو ډېر توقعات دي. ډېر مشکلات او ډېرې مسئلې دي چې هغه حل کول غواړي. يو خوا د آئيني، قانوني، عدالتي او د صوبائي حقونو او اختياراتو مسئلې دي، بل خوا د خلقو د روزګار، تعليم، صحت، د ځان او مال د تحفظ مسئلې دي. د ارزان او فوري انصاف يقيني کولو مسئله ده. د پې جوازه ګرانۍ مسئله ده او داسې نورې ډېرې مسئلې دي چې هغه د پخوا نه حل طلبې راروانې دي. تر څو چې دا مسئلې حل شوې نۀ وي نو په ملک کښې قراري راتلل ممکن نۀ دي.

            د بدقسمتۍ نه په دې ملک کښې جمهوريت ته موقعه نۀ ده ورکړې شوې، د ملک واک اختيار زيات وخت د فوجي او سول افسر شاهۍ، د هغو د حمايت کونکو موقعه پرستو جاګيردارانو، سرمايه دارانو په لاسو کښې پاتې شوے دے. د چا ترجيحات چې د خپلې کرسۍ مضبوطول، د خپلو ځانونو او خپلې طبقې مفاد وو. په دې وجه په ملک کښې د جمهوري کلچر، جمهوري رويو او جمهوري ادارو په ځائې د ځان ځانۍ، موقعه پرستۍ، خوشامدګرۍ، بدعنوانۍ، منافع خورۍ، رشوت خورۍ، منافقت او عدم روادارۍ کلچر رواج وموندۀ.  په ملک کښې د حکمرانانو د غلطو پاليسو په وجه د هېروئن، کلاشنکوف، دهشت ګردۍ او ځان وژونکو بمبار کلچر مينځ ته راغے. د امن خوښونکو خلقو دپاره ژوند تېرول ګران شو، هر چا سره د خپل سر ويره پېدا شوه. دا ملک چې د کوم مقصد دپاره جوړ کړے شوے وۀ هغه مقصد او منزل چرته لرې په تيارو کښې پټ شو.

            اوس چې يو ځل بيا خلقو ته د رائې ورکولو موقعه ورکړې شوه او خلقو خپل مشران چوڼ کړي او اسمبلو ته ئې ولېږل نو په کار ده چې اسمبلو ته پوره اختيارات ورکړې شي. د مرکز او د صوبو د اختياراتو مسئله حل کړې شي او صوبو ته مکمله خودمختاري ورکړې شي چې د دې جوګه شي چې د خپلو خلقو د سوکالۍ، خوشحالۍ او خېر ښېګړې دپاره کار وکړې شي.

            د پښتو ليکونکو اديبانو، شاعرانو او دانشورانو د تېر هر حکومت نه دا مطالبه په بيا بيا کړې ده چې د دې صوبې د اکثريت ژبې پښتو ته دې خپل جائز حق او مقام ورکړې شي او دې صوبې له دې خپل تاريخي او ثقافتي نوم پښتونخوا کېښودے شي. پښتانۀ ليکونکي، اديبان، شاعران او دانشوران د نوو منتخب شوو مشرانو نه هم مطالبه کوي چې پښتو ژبې له دې خپل حق او مقام ورکړې شي او د صوبې نوم دې " پښتونخوا"  ومنلے شي ځکه چې دا د ټولو پښتنو غوښتنه او د زړۀ اواز دے.